أستغفر الله العظيم وهو الرزاق الكريم ماشاء الله ولا قوة إلا بالله
سبحان الله وبحمده سبحان الله العظيم
العرايس الحلوين الا كتب كتابهم قرب وعاوزينه يبقى مميز وليله جميله هقولك على شويه افكار بنعملها فى العيله عندنا يوم كتب الكتاب يارب تستفيدوا منها : الفستان والمكياج : ياريت يبقى حاجه شيك وبسيطه اوى ويبقى لونه فاتح يعنى لو ابيض بدرجاته يبقى حلو اوى عشان تبتدى حياتك على الخير والمكياج طبعا يبقى بسيط وهادى وكمان لازم تبقى جاهزه من بدرى وياريت تجيبى واحده من كوافير تظبتلك الطرحه والمكياج فى البيت بدل متخرجى وتبهدلى نفسك وتبقى تلفى شعرك عشان يعنى لو محجبه هتبقى دى اول مره خطيبك يشوف فيها شعرك فتبقى جاهزه عشان لما تقعدوا مع بعض تبقى تقومى تعملى تسريحه خفيفه على الماشى يعنى اه هتبقى محجبه بس هتبقى مظبته امورك انك هتقلعى الحجاب
مكان اقامه كتب الكتاب : يعنى لو كان فى الجامع مثلا او فى قاعه معينه للمناسبات الا من النوع ده الموضوع هيبقى سهل لانك مش محتاجه انك تنظمى بيتكم قبلها بيوم عشان الضيوف الا هتيجى وكده لكن لو فى البيت يبقى لازم تكونوا عملين عمليه تنضيف شمله لجميع اركان المنزل وتبقى مكرره كتب الكتاب هيبقى فى اى مكان بالظبط وتبدأى تنظمى امورك على هذا الوضع يعنى تختارى مكان واسع يكفى الناس الا هتيجى ومكان تانى اصغر لنساء وهيبقى ده المكان الا هتئعدى انت فيه الاكل والمشروبات : طبعا بالنسبه للاكل ده حسب الرغبه والعادات والتقاليد يعنى فى ناس لازم تعمل اكل وعزومه كبيره لضيوف الا جايه بس نصيحه من بلاش الموضوع ده لانها بتبقى بهدله للبيت وتعب لاهل البيت يعنى لو جاتوه وشكولاته يبقى حاجه كويسه اوى وشيك فى نفس الوقت وبالنسبه لشرب ياريت يبقى شربات بيبقى حاجه مش كتير بيعملها ولازم تجهزوه من بدرى عشان حلوته وهو ساقع وكمان تبقوا مجهزين الكوبيات الا هتكفى العدد الا جاى ولو عدد المعزومين كتير يبقى هتقدموا حاجه ساقعه كانز مثلا ولما الناس يمشوا وبفضل اهلك واهل خطيبك بس تبقوا تقدموا الشربات واحنا عندنا العريس لازم يجيب بنبونيرا لشكولاته الاهى يعنى علبه شكولاته شيك مع الجاتوه والشربات وطبعا لو معملش كده يبقى عادى خالص وانتوا لازم تبقوا ذوق وتكرموا الناس الا دخلين بيتكم وبعد بقه مع البيت يفضى لازم ام العروسه تبقى مجهزه عشا حلو كده للعريس والعروسه يعنى تعشوا الرجل قبل ميروح مش معقول هيروح لامه يقولها انا جعان هيبقى شكلكم وحش اوى ههههههههه
هتعملى ايه وكتب الكتاب بينكتب : 1 / طبق بلاستك او صنيه متبقاش غويطه اوى 2 / كوبيات زجاج متوسطه الطول وصنيه تقديم عاديه 3 / شمع ملون 4 / ورد طبيعى وشويه عترشان او اى ورق اخضر له ريحه حلوه 5 / سكر نبات وده هتلاقيه عند العطار * المصحف الشريف * هتجيبى الصنيه وتحطى عليها الشمع الملون وتنوريهم هيبقى شكلهم حلو اوى , وهتجيبى الطبق البلاستك وتحطى فيه شويه مياه وتحطى عليهم الورد والورق الاخضر وطول مكتب الكتاب بينكتب تحطى رجلك فيهم وتمسكى المصحف الشريف وتقرأى فيه عشان ربنا يكرمك والورد الورق الاخضر عشان حياتك تبقى خضره ومنوره طول عمرها واختك او اى حد من اهل البيت يديكى واحده سكر نبات وحماتك واحده والعريس واحده وده عشان تبقى سكره فى قلب جوزك وحماتك وتمصوا فيهم وكتب الكتاب بينكتب انا عرفه انكم بتضحكوا دلوقتى وبتقولى عليا ايه الهبله دى والله يا بنات احنا متعودين نعمل الحاجات الحلوه دى فى الكتب الكتاب بتدى طعم حلو لليله وكمان لو تبصى هتلاقيه حاجات تبشر بالخير وياريت يا قمر لو يبقى تصوير فيديو عشان بتبقى ذكره حلوه اوى ولازم يبقى فيه كاميرا عنده العريس وكاميرا عند العروسه وياريت لو فى قلم مميز كده وروش عشان تمضى بيه على الورق بتاع كتب الكتاب ومتنسيش المنديل القماش الابيض الا هيستعمله المؤذون وهو بيكتب الكتاب وقبل كل ده ياريت بابكى وخطيبك يبقوا متفقين على كل التفاصيل يعنى المهر والمؤخر والقيمه والحاجات دى ويبقى قبلها بيوم مثلا عشان ميحصلش لقدر الله مشاكل فى ساعه كتب الكتاب عشان الليله متبوظش لسمح الله معلومه على الماشى الحبر الا هتختمى بيه على الورق بيروح بالخل والليمون شوفوا يا بنات يا حلوين طبعا بعد ما الضيوف تنسحب والجو يهدى هتبدأ مرحله الظرافه عند العريس هتلاقيه مش قاعد على بعضه وطبعا هيعد يهبل بئه ويقولك انت دلوقتى مراتى وحلالى وشويه الهبل ده اوعى با بطاطا تسمعى كلامه اساسا كلامه مش صح لانه لازم ياخد اذن ولى الامر قبل متبقى مراته رسمى يعنى والا بابكى عمله هو كتب الكتاب مش اكتر يعنى هيقولك هاتى قطا ولا بطه اوعى تعبريه خليكى مسكه نفسك هههههههههههه عشان والله هيبقى مش كويس لو سبتى نفسك لتهلكه وهترجعى تندمى ومعتش حاجه مضمونه يعنى انت بردوا مش ضمنه انه هيبقى جوزك ممكن يحصل اى حاجه ومتكملوش مع بعض لا سمح الله يعنى اظن يعنى كلامى واضح هتتعبونى معاكوا ليه طبعا انا رغيت جامد اوى خالص معلهش يا بنات والله حولت اختصر على اد مقدر سمحونى وياريت تستفيدوا من الموضوع ده
شاركنا رأيك وكن اول من يقوم بالتعليق :)[ 0 ]
إرسال تعليق